IN SINTERVAOSKÈRREK
  
refrein

Fiederalalala fiederalalala
Fiedera fiedera fiederalalala

In Sintervaoskèrrek al in 't portaol
Dao spreke de hèllege doufstómme taol,
Fiederalalala fiederalalala
Fiedera fiedera fiederalalala

Sint Pieter dee huurt get en zeet gans verlege;
"Iech geluif dat heij eine get heet laote vlege."

"Wat iech ?" zeet Ambrosius, "iech haw me fetsoen
Iech zouw miech wel wachte um zoe get te doen"

Bonifatius weurd koed en zeet gans brutaol;
"Iech höb niks gedoon en iech vin 't e sjendaol."

Franciscus steit achteraon tege de roete
"Iech weit nörreges vaan en iech haw m'ch de boete."

Antonius dee zeet: "Gedraag uuch wie 't huurt
Iech höb 't hiel dudelek al twie kier gehuurd."

Canisius dee zeet: "Iech höb niks gedoon"
"Man hat da geschossen" meinde dee te verstoon.

Monulphus weurt vals dat me häöm kós verdeenke;
"Dach geer nondedjú dat iech heij staon te stinke.

Aloyisius hèlt z'n ouge ten hiemel geslage.
"Ach juzzes die lóch die is neet te verdrage."

"Wee zeet" zag St Roches "dat veer heij dat dege,
Missjiens zien ze op 't kloester de huiskes aon 't vege."

Gondulphus dee brölde vaan achter 'ne pilaar;
"Es miech eine get zeet, wel dee houw iech veur z'n staar."

" 't is te erreg" zeet Paulus: "Wèlt geer wel 'ns zwiege
Um veur e doedgewoen puupke zoe'n ruizing te kriege."

Sint Servaos dee zag niks, stónt zoe stèl wie 'n moes.
En dach beij zien eige; "meh iech bin heij toch thoes."

Sint Pieter zeet op 't lèste: "Laote veer noe mer hope ,
Dat 't noets mie gebäört en zèt 't vinsterke ope."